الدم السوري

وضع المجازر في سوريا ما يبشر بالخير .. لكن نسأل الله انه يعزهم ويعجل بنصرهم .. مهما حسيت ولا كتبت اللي اشعر فيه .. اكيد ما راح احس فيهم .. لاني ما جربت الجوع .. ولا جربت الخوف من الموت .. ولا جربت البرد القارس .. ولا مريت في ذل ولا قهر .. اعرف معاني اللي ذكرتها .. بس بشكل اخر .. يارب ادم النعم علي ووازعني على اشكرك ..  اللهم لك الحمد كما ينبغي لجلال وجهك وعظيم سلطانك ..

سوريا درب العدل والحريه .. محفوف بالدماء .. ولكل عمل ثمن .. ولكن العبره بالنهايات .. و الله ما راح يضيع قطرة دم راحت منكم .. راح تلقونها يوم الحساب .. جبل من الحسنات .. ما في يدي الا الدعاء والكلام .. وفي القريب العاجل ندعمكم بالمال والسلاح .. ولو انها خطوه تأخرت بشكل كبير .. لكن ما في اليد حيله ..

حقيقة واقي الحالي

قبل ان اتكلم .. كنت قد خططت .. ان اكتب كل يوم في المذكره .. لكن للاسف ما وفيت بالخطه.. اليوم ساتكلم عن واقعين مختلفين متضادين.. الفرح والخوف .. ببدا بواقعي المفرح

الحمد لله كنت اطمح اني املك مشروع خاص فيني واصبحت الان في وسط الخطه اللي وضعتها للحصول على الهدف .. لكن سؤالي ماهو اللي دفعني لهذا الشي .. هل من جد انا حاب افتح مشروع .. ولا لان الواقع في الحقيقه رفضني .. واتجهت لا ابحث عن ذاتي واقنع العالم اني انا اللي رفضت الوظائف .. ورفضت العروض اللي جتني .. ليش انا فرحان بواقي الحالي .. انا مبسوط انها كانت فكره حبيسه في راسي .. واليوم سعيت لتنفيذها .. وصرت احقق اجزاء منها .. تعرفت في الدوره على اشخاص راح نكون علاقات صداقه ومصالح متبادله اكثر .. راح من جد ادخل عالم ثاني .. عالم بزنس .. عالم اتصالات طوال الوقت .. عالم تشوف نفسك وانت تبنيه .. راح اكبر في نظري لو كبر المشروع وصار موجود على ارض الواقع .. راح ادخل اصبعي في عين كل واحد كسر مجاديفي .. راح اقول للعالم ولاصحابي .. انتوا اخترتوا طريق الوظيفه ورضيتوا تكونوا تحت اداره ناس يدرون وقتكم ومالكم .. انا اخترت ادارة نفسي .. انا احسن منكم انا افضل منكم .. انا اخترت طريق صح طويل لكن وصلت .. انا يايمه انا ياابوي .. انا حققت احلامكم ورفعت راسكم .. انا راح اساعد اخواني .. وافتح لهم مشاريع خاصه فيهم .. راح اساعد اصحابي .. اقاربي راح اوقف في صفهم .. عالمي اللي اسعى له واللي اعيشه ما ابغى اصحى منه .. لازم احققه .. يارب لو ماساعدتني ووفقتني راح انتقل لعالم انا ما ابغاه عالم مخيف.. يارب لا تتخلى عني .. يارب ساعدتني .. يارب ساعدني .. يااااااااااااااااااااااااااااااارب ساعدني

واقعي المخيف .. انا اقنعت العالم ان الوظائف جت ورفضتها .. بس ما اقنعت نفسي .. انا لو فشل مشروعي .. او ما دعموا مشروعي .. راح ينقلب عالمي حزين ومخيف .. كيف ارجع لنقطه ان اقنعت العالم فيها .. راح اطلع كذاب .. راح ينكشف سر انا مخبيه على اهلي .. اهلي راح ياكلون اكبر مقلب في حياتهم .. انا لو ما نجح مشروعي راح اصير اضحوكه .. راح اطلع صغير .. لانه في الحقيقه مافيه شركه قبلت فيني .. اصحابي اللي تخرجوا معي من دفعتي كلهم توظفوا ايه نعم كلهم توظفوا .. ولهم فتره طويله .. وكمان الخرجين اللي بعدي توظفوا .. وكلهم بمرتبات حلوه وقويه .. باقي انا ما توظفت .. اللي احسن مني واقل مني توظفوا .. وانا اكابر واقولهم انا رافض الوظيفه .. عندي مشروع ان شاء الله راح يغنيني .. في الحقيقه الجزء الوحيد اللي انا صادق فيه اني ان شاء الله راح افتح المشروع .. بس ياخوفي لو ما فتحته ..ماني عارف وش اسوي خايف .. خايف من نظرات العالم اهلي اقاربي .. يارب لاتصغرني ..