من جد راح اكبر في نظري

كملت من تخرجي ستة شهور .. وصار الشي اللي ما توقعته .. يعني حافز راح ينزلي هذا الشهر .. معا اني كنت متامل اتوظف قبلها .. بس ماهي مشكله .. اللحين انا قاعد افكر اسوي مشروع خاص فيني .. مشروع لو يمشي راح اكسب ذهب .. واقدر اعيش واعيش اخواني معي ..

بس قبل كل هذا انا لو من جد سويت مشروعي راح اكبر في نظري راح اكون انسان ثاني من جد ما ادري كيف راح يكون شعوري .. اذا هو حلم اشوف نفسي سويت شي كبير تخيلوا يصير واقع

راح تكون حقيقة واقعي وقتها واااو .. يارب ساعدني

تسالوني وش اللي موقفني .. اقولكم ما فاتحت اهلي في الموضوع

انا لو اهلي يدعموني معنوينا راح افلها ..

مشروع خاص

اكيد اغلب الناس مسوي له كذا خطه وبصراحه انا املك الخطط الخاصه بي .. بس للاسف ما تنفذ ولا شي منها الشغله ماهي بيدي هي بيد رب العالمين وحاليا افكر افتح مشروع خاصه فيه .. بس احتاج الدعم المعنوي من اهلي اكثر من المادي .. لان كل الناس تؤمن ان الانسان يفشل ويتعثر بحياته .. بس لو صار معاك هذا الشي وفشلت المحيط اللي يحيط بك راح يخنقك ويعلقك من رجولك .. المشكله ان اهلي يبغوني اتوظف .. والمشكله الكبرى ما يدرون عن وضعي الحقيقي .. ودي اعترف لهم ان معدلي مقبول .. صح الشركات ما سالوا عن المعدل بس هم متأملين ان ارامكو يوظفوني .. او اطلع بعثه .. يارب ماني عارف كيف اتصرف .. ودي اسوي مشروعي .. ما ابغى اتوظف .. يارب ساعدني ..

اقولكم شي .. تخرجت انا و14 طالب معي من الجامعه .. كلهم توظفوا وفي تخصصي واللي مو في تخصصي توظفوا في قطاعات قويه الاتصلات والصحه .. وكمان الدفعه اللي قبلي توظفوا .. واللحين الدفعه الجديده اكيد بيتوظفوا وانا جالس <<< ماهو تشائم بس احس ان الله يختبر صبري وكمان احس ان الله يدفعني اني اسوي مشروعي .. طبعا انا متفاهم معا نفسي بعض الوقت وبعض الوقت احس اني بختنق ..

يارب يا حي يا قيوم ساعدني 

الرخصه

اليوم عندي اختبار رخصه وشايل هم ودي اطلع رخصه وافتك من جد صح انه اختبار توماتيك بس ودي افتك يا عالم

الشعب توظف

ما شاء الله تبارك الله الله لا يضرهم <<< والله اكتب وانا من جد اتمنى لهم الخير والتوفيق
تخرجنا 14 طالب وكلهم توظفوا ووظايف مرموقه وفي شركات كبيره .. وانا لسى اقشر بصل

على العموم اتمنى لهم التوفيق في حياتهم وادري ان الله راح يرزقني بس انا اللي مزعلني على نفسي اسوي اشياء ماترضيني ولا ترضي الله سبحانه وتعالى


بس ما اقول غير الله ييسر لي ويوفقني لما يحب ويرضى واتمنى احقق المشروع اللي في بالي ويرزق اخوياي  ويرزق اخواتي واخواني