كل شي له بداية وله نهايئة .. البداية هي ركيزة اي شي تبداء صح يمكن توصل .. تبداء غلط اكيد راح تتعثر ومن المستحيل توصل
انتهى عام 2011 كان عام بالنسبة لي فيه ايام حلوه ونهاية مره.. سددت مخالفاتي بقيمة 7000 ريال - الوالد استلفها عشان اقدر اطلع جواز سفر .. وطلعت جواز السفر .. عشان الوظيفه اللي كنت اتوقع انها في يوم راح تكون لي ..بس لحد الان لا لا لا ماهي لي .. فيه من اهم الاشياء تخرجي من الجامعه .. صرت اعسل كثير معا اني ماعسلت في السنوات اللي راحت .. ماتت جدتي الله يرحمها ويغفر لها ومن حقارتي اليوم اللي بعده سافرت البحرين وتمشيت معا اخوياي وسينما ومعسل وعشاء واحلا ضحكه .. حسافة حبك لي يا جدتي ما استاهل اني اكون حفيد لك .. من الاشياء اللي جربتها مافيه شي جديد يذكر.. قاعد اعصر مخي ابغى افكر في شي..اشتغلت كداد .. طبعا بعد التخرج كنت مأمل اتوظف بدري .. ودعيت الله ماتنتهي السنة الا وانا موظف .. اخر يوم في 2011 .. جتني وظيفه .. بس ما اعجبتني رفضتها .. خفت كثير خفت ان هذي الوظيفيه اللي كتبها الله لي بس انبسطت انه استجاب دعائي وجبر بخاطري رغم اني ما استحق ..
اليوم هو اول يوم في السنة الجديده 2012 .. الله واعلم وش حامل فيه من مفاجائات ولا مفاجعات .. في عام 2009 كنت انا وصاحبي في المطعم واول ما دخلت السنة الجديده تصورنا ( برجر 777 اللي في طريق الملك عبدالعزيز ).. وفي عام 2010 كان ليلة خسوف القمر وجينا نبغى نتصور انا واعز اصحابي الا ان واحد من الشباب رفض وقال نصلي وبعدها نتصور .. وصلينا وبعد الصلاه على الساعه 2 تصورنا بس للاسف رفض يعطينا الصور.. وحقدت على نفسي قلت يا ليتني صورت بالجوال .. وفي عام 2011 .. تصورت انا وناس من الشباب كنا في طلعة بر معا بعض .. بس للاسف كل الصور انمسحت .. اخ من القهر اللي جاني ..
يارب دخيلك خلها سنة خير عليه وارزقني الوظيفه انا واخواتي واعز اصدقائي .. وكمان يارب لا تجعلني افقد غالي .. وعلى سيرة الغوالي يارب ارحم ولد عمي واغفر له ذنبه واجعل قبره روضه من رياض الجنه وجدتي الغاليه وكذلك المسلمين والمسلمات المؤمنين والمؤمنات الاحياء منهم والاموات ..
ويارب اطل في عمر امي وابوي واخواني ولا تفرقنا عن بعض ويارب قدرني على اسعادهم ومساعدتهم .. يارب لا تتخلى عني .
ليست هناك تعليقات:
إرسال تعليق