فضفضة.. حساس بزيادة

تمُر لحظات على الشخص يكون حساس فيها بزيادة .. ادني رد او حركة حتى لو بدون قصد لو مزح .. تقلب مزاجه وتعكر صفوة
انا حاليا امر بهذه اللحظات .. ما اتقبل اي شي من احد حتى لو من اهلي وخاصة من ابوي وامي ..(الله يطول في عمرهم ويخليني ذخر لهم ).
تصير مشاعرك متلخبطة .. ما تدري انت صح ولا خطاء ..
انا اعرف شعوري .. انا في حالة ضعف الان .. لاني شخص عاطل .. ودي اسافر .. واشتغل اي وظيفة .. واقفل جوالي .. بس اكلم اهلي واطمنهم عليه بدون ما يدرون وش اسوي ولا وش قاعد اشتغل..
انا من الاشخاص اللي مدخل اهلي في كل صغيره وكبيره في حياتي .. فلما اجي اطلب منهم شي ويرفضون ازعل.


تدرون لي شهر وعشره ايام ماطلعت ولا رحت ولا جيبت قاعد في البيت مثل البنت .. جيت  طلبت اهلي اشترك في نادي .. قالوا لي انت راح تكمل شهر ولا بتروح يومين وتتركة .. طبعا زعلت وانا من الاشخاص اللي يطلب مره وحده..احس اهلي صاروا يدقوقون عليه من ناحية الصرف معا اني ما طلبتهم ولا ريال يخصني كشخص.
مدري هم ملاحظين انه خلال الشهر ما طلعت ولا طلبت ولا عشاني اروح معهم واكل واشرب معهم على بالهم اني مبسوط.
طبعا انا مقهور وزعلان وما اكذب عليكم بكيت وانا اصلي بجنب ابويه صلاة المغرب ( بُكى على الساكت بس دموع تنزل ما يحس فيها ).. رحت اشتري بطاقة شحن عشان اشحن البلاك بيري وبعدها رجعت البيت وقلت لابوي تراني بشحن الجوال
قال بكم وكانه مايعرف كم الشحن قلت له ب80 ريال قال الله الله .. وناظر في اختي وقال اخذ حتى ما قالي .. انا ادري انه يمزح او يتريق المهم انه ضاق خاطري واجد.

واحس اني بنت مغلوبه على امرها وانا اشتكي...وهذا الشي يزيد القهر قهر..

بس حبيت اقول لكل شخص بيقراء كلامي .. ترى الاحاسيس مثل الزرع اذا تركتها راح تننمو بس نصيحتي لي ولكم الاحاسيس اللي تحسها بترجع عليك بالمضره اقطعها وهي في مهدها روح وفضفض وقول اللي في قلبك.

يعني انا مفروض اروح اقول لابوي وامي باللي احس فيه ... طبعا انا راح اقولهم بس بطريقة غير مباشره .. اللحين راح ارجع بطاقة الشحن وبرجع الفلوس لابويه .. وبيسألني حقت ايش هذي بقوله حقت الشحن.
وهو راح يفهم اني زعلت بدون ما اتكلم ...